RETRATTU DE UNU DISOCCUPADU

T'ido, disoccupadu, in disampàru
chi passas in s'istrada a fronte bascia
cun chizu lagrimosu,
ojos isbambarriados a su nudda;
e unu coro istramadu 'e sas penas
intro su pettus , moribundu, ti battet
mentras chi un'anima de 'iddìa
samunas in su sole 'eranile
da chi d' annéu s'est insambenada .
Pastore chena bamas ne cuile
cun sas piagas bandas de sa mente
in andalas de pedra e de ispina.
Ti frittit sa carena indebilida
s' iscura solidade turmentada
e su pesu 'e sos annos istasidos
fattu t'hat canu dogni pensamentu.
Avrèschidas giaras bisas de lentore
ma avrèschida no est ch ' est notte funda ;
ei s'oju tou casi zegu
chilcat chelos attesu
cun s'ultima ispèra 'e sa lughe.
Costazu insambenadu che a Cristos,
una rughe trazzas de ruinzu
e zoccas de gianna in gianna
in s'isettu apretadu
d'una zertesa chi non bies mai.
Ses solu cun su frittu de su sero
e intro sas tancas d'un'intragna dirrutta
giughes ispartu e sinistru
su fiore grogu 'e sa morte;
sa mente iscolzolada e battazada
fatta s' est in color'e notte mala!
No has tribagliu, frade, no has vida:
neulas impiedosas de attalzu
t'imboligan sos passos insiguros
cando recuis , manos istampadas,
a domo pro che jughere su nudda ,
cun cara signada e pibirista infusta
tue passas in s'istrada a fronte bascia!