LINNA

Logus no biu, innui no crescit, innui no ci siat:
Iogus de soli, de bentu, de nì,
montis, pranus, furrungonis e prazzas.
Linna po palazzus de arriccus, po domus de poberus,
accorradroxus de bestias, po barracas de pastoris.
Cumpàngia de sempiri de sa nascida a sa morti:
linna po scappa-a-peis e brassolus de sanziai a notti intera,
linna po giminera po contai contuse faulas .
Linna po lettus, chi ascurtat scraccaglius e attitidus ,
linna chi biri, linna chi intendit fueddus de amori,
linna cittida, linna chi sciri!
Linna po si gioghittai, po manixu e arropai,
linna po gruxis , po baulus ... po si nc'interrai.
Linna appreziada, ammuntonada e segada,
linna traballada a barras siddadas, linna murrungiada .
Linna punciada cun obbilus de ferru e luttoni ,
linna antiga de cuaddus armaus ,
linna tostada, abbruxada e fatta a craboni.
Linna 'e sarmentu po coi druccis, civraxus e panadas,
po arrostiri azzidroxus, pisci e anguidda, linna 'e sustentu.
Linna chi sonat cun buccas e manus,
linna chi allirgat ogus e corus,
linna po santus, po pibionis de rosarius,
po fogaronis, po s'ingenugai, linna po pregai.
Linna molida e fatta a paperi, linna 'e cumpangìa
po dis de ierru, linna 'e cunfortu po cambas stancas,
cuilis sigurus de bestias e arresis.
Matas de orroli incrubadas de su bentu,
boscus de ilixi, zinnibiri e olioni,
linna frisca, linna profumada,
linna turmentada, segada e furada,
linna disisperada e azziccada de pampas,
linna affumada e turrada de fogu,
linna abbruxada de manus maladittas!