ARREU BRULLENDI

Arreu brullendi
cun is aterus piccioccus
hapu giogau in s'istrada
e in s'innida arena 'e su Poettu
denanti su lugenti
oru de su mari.
Oh! Dis nodìas de bramas in cria!
S'arretumbu 'e cussus giogus
mi bettit pimpirinas de vida
du sentu accanta mia
mi preguntat: aundi funti
is allirgus cumpangius?
Medas
is pilus impratiaus
dognia tanti sconchiendi,
coment' 'e mei,
sezzint immoi
in sa rotonda de is bagnus
in su durci logu
i a is bortas
s'isprigant ne is aquas assuermadas
in ateras
in s'abbolottu 'e sa maretta
corrinendi facci a sa riba.