FIZOLU MEU MIGRANTE

Ca so turpu so frimmu, arrimau,
bivo chin sos ammentos de pizzinnu ;
est pro cussu chi commo mancu a tibe
poto dare s'azzudu chi meritas
in s'ora de s'impinnu pro che zumpare
su mare mannu chi s'isula chinghet.
Bistìu de linos modestos
has toccheddau in sa janna mea,
dego t'hapo accolliu
che fizu a sa gherra iscampau
" ... si pedis ca ti serbit su chi pedis,
jà est zustu s'impinnu in su pidire,
ma tue pedis troppu fizu caru;
s'azzudu meu est solu in su cussizu
pro chi non boles chin sa fantasia,
issa est bella , bella ebbia,
ma non ti podet in mezus ghiare ... !"
Frimma sos pedes in terra
e pompia, pompia tranchillu e serenu
sa reartade chi ti porrit s'ocru ...
Bae chin Gesus, fizolu istimau,
e prestu ghires chin su coro prenu
de pache 'e amistade
ca sa pache da l'ischis
est sa pastura pro s'anima.
... e si su pane no est saporìu
est ca in cussos locos de muìna
usan peri farina
chin sa de risu bene ammesturada,
non semper subettada
chin abba 'ona, abba zenuina!
De custa terra chi ses pro dassare
piccati totu fattu pro su coro;
ca s'ammentu de issa,
- in su tempus chi innedda has de istare
t'hat a porrire cantecante anneu ... !
Dego intantu sico a che trazare
su pesu de sos annos;
e pro tene fizolu de su coro,
ca so turpu hap'a precare
leghende in sos sonos ...