A SA SARDIGNA

Sardigna, eo ti cherjo vene semper,
e cando ti ridet in occios su sole
e cando sas temporadas ti turmentana.
Ite bella chi ses cando in beranu
vestis sa vardetta virde e su curittu
chin sas palas ricamadas a fiores
e sa camisa tessia a margheritas,
e ti riden in su muccadore colorau
sos occios virdes, sos canterjos rujos!
Ti luchet unu chelu limpiu e calmu
e ti carignat s'agheredda lena .
Eo, settiu in sa preda 'e unu nurache,
vadio sas alas ispartas de s'astore
in bolu lentu e seliu e ti respiro.
Ma ses bella peri in annos de siccagna,
cando sa pedde tua est tottu a piccias
e ses garriga de chisina 'e 'ocu,
bella e trista comente a cada marna
cando su izu pius malevadau
li ghettat neches de su janile suo.
Eo so' tando su izu chi ti vadiat
e non bi l'ischit a t'acconnortare
e podet pezzi piangher marna e frade.
E l'isco chi sos frades chi ti brujan
sun brujande peri a issos, e pro ambos,
pro issos e pro tene, mi nd'appeno,
ca s'imus istettios tottus sistemaos,
dae su pius mannu a su pius minore,
nos imus accattaos semper in 'esta
e t'aviamus appia vestia 'e isposa,
tottu s'annu pro tottu sos annos,
dae sa tivazola bianca 'e Monte !spada
a sos pedes iffustos in su mare.
T'aviamus presentada a sos istranzos
chi venin pro duas dies e pretendene
de ti cherrer vene pius de nois,
ma no avian potiu goddire unu fiore
nè moer una preda, un'arenedda,
ca, si pares bella a issos chi ti viene
una die in s'annu e curre curre,
ite ses pro chie t'at respirau naschinde
ed est attu de tene, dae sas ungias
a cada disizeddu, a cada affettu,
a sa gana de s 'isfachere in sa terra
ca non b'ischit a istare chene tene.