(Attitidu
a Nuoresa)


Lamìa de un'isposu
in morte de s'isposa


Mi nd'iscancat su coro
s'istriosa ferida
ca "tuccada" ti ses diosa mia.
A morte m'addoloro
chi pro totta sa vida
mai ti dasso chena cumpanzìa.
Cara mia diosa
no mi franco un'ora da-e sa losa.

Ite 'alet bisare
cando una traschìa
ti furat da-e sos ojos sa lughe!
Prite a m'isprendare
de su bene ch'haia
Deus pro vida mi pones in rughe.
Fin atteros accisos
sos ch'hamos bidu in fadados bisos.

Cuddos ojos lughentes
semper chena tristura
mi faghian donzora de avrore.
Como in su 'enente
mi fuet sa lucura
e bido solu dies de iscurore.
Fis che una lantìa
semper in 'onzi passu chi ponìa.

Fis nidu de sentidos
dilicados e sanos
chi non m'han intregadu mai orpellos.
Accò chi sun fuidos
sos risittos galanos
chi logru mi han dadu e pessos bellos

Como cun fagher grae
ti "tuccas" muda muda che-i s' ae!


Francesco Dedola